SIBU: Opis Pengintu Pengelantang Mensia Mayuh (JKM) benung ngelala penyuwa enggau pengempu premis ke dituntung penusah angus ngaul begunan lot kedai tiga ringkat di Jalai Khoo Peng Loong ditu ngambi bantu ulih diberi.

Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madah, raban sida deka bekerejasama enggau Balai Dagang enggau Industri China Sibu (SCCCI) dikena ngulihka penerang bekaul penyuwa sereta pengempu premis nya.

Ku iya, tebal agi premis ke angus nya premis suwa, seraya pansik bekaul pun penusah enggau status dijaga insurans deka dipejalaika raban Opis Bomba enggau Penyah Penusah Malaysia (JBPM) begulai enggau agensi bekaul.

Ku iya, KPM mega ngulihka penerang bala ti diau, nyuwa enggau pengempu premis ngambi bantu ulih diberi, seraya jalai nya ditutup dulu ungkup pengelikun laban struktur beguna agi ulih tekerap.

Iya nyebut pekara nya lebuh dirandau media pengudah ngabas endur penusah nyadi, Hari Tiga.

Seraya Direktor JBPM Sarawak, Jamri Masran madah ke penusah nuntung seluntang begunan ngundan 13 unit lot kedai mujur diputar kandang dua jam pengudah sida nerima kangau pukul 1.29 ngalih hari.

Ku iya, api dipelaba jampat nyerarai laban bisi utai jampat empa api baka minyak, tiner, plastik enggau getah di dalam premis kelimpah nya begunan lama ke digaga dalam taun 1960-an.

Iya madah baru, sapat dinding entara lot kedai ke enda datai ba perabung mega ngasuh api enggau sebun jampat nyerarai ngagai unit sepiak.-EDISI UKAS