SIBU: Sarawak ngembuan juluk ati deka nyulut ba ekonomi gadung, energi beresi enggau indsutri besai lalu ngenegap gela pemadu mayuh nyaup pengerembai ekonomi Malaysia.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pelin pemansang ke digaga perintah nengeri ukai semina nyaup pemansang Sarawak tang mega bela nyaup nyungkak pengulih Malaysia besemekih ba renggat serantau enggau global.

Ku iya, Sarawak mutus deka ngemansangka diri ba teknologi baru, 'artificial intelligence' (AI), ekonomi digital, energi beresi enggau industri besai seriris enggau pengeransing nempa pemeruan ekonomi dudi hari.

"Juluk ati kitai deka nempa Sarawak nyadi pintu penama Malaysia bekaul ekonomi gadung. Kitai deka Sarawak nyadi hub energi beresi.

"Kitai mega deka meda Sarawak nyadi palan industri besai lalu deka meda Sarawak pemadu mayuh nyaup pengering ekonomi Malaysia," pia ku iya.

Iya bejaku munyi nya maya Pengerami Begempuru Hari Sarawak enggau Konsert Rayat ditu, Hari Tiga.

Bela datai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi.

Premier Sarawak madah, Malaysia deka tegap enti tiap buah wilayah mansang nitih pengering diri empu lalu mandangka ulah federalisme ke bendar.

"Tu mih federalisme ke bendar. Ukai besemekih enggau pangan diri lalu pemansang ukai digaga ba siti endur aja tauka ba siti wilayah aja.

"Tang kitai bela besaup ngeringka menua nitihka pengering diri empu," ku iya madah baru.

Iya sekali agi madahka juluk ati Sarawak deka nyadi “Bavaria Malaysia”, iya nya nyadi menua ke mansang ti ngembuan pengering ekonomi, modal mensia bepengelandik sereta institusyen perintah enggau prebet ti tegap. -EDISI UKAS