Sarawak Ngena Manah Pengaya Rampa Menua Asal Nyungkak Ekonomi Kuasa Ulih Dikena Baru
SIBU: Sarawak ngena manah pengaya rampa menua asal nyadi penyungkak pemansang ekonomi bepelasarka kuasa ulih dikena baru ngambi angkat nyadi kandang menua bepenatai pemisi besai enggau hab kuasa gadung serantau.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, idar ngagai ekonomi bepuguka kuasa beresi nyadi singkang strategik Perintah Sarawak napi pemar ubah klimet global, kelimpah ngiga pemansut ti ngasuh ekonomi tumbuh meruan agi.
Ku iya, pengawa ngambi Tekat Ai Hidroelektrik Bakun ari Perintah Besai nya entara pemutus besai ti ngasuh Sarawak ulih ngausa pemansut kuasa kediri sereta negapka penuduk nyadi menua nguasa kuasa di rantau tu.
“Tu mih kebuah aku ngambi Tekat Ai Hidroelektrik Bakun lebuh aku nyadi Kepala Menteri laban kitai deka ngatur kuasa, lalu Bakun diempu orang Sarawak,” ku iya.
Iya nibar ke jaku nya ba sesyen Townhall serimbai Nyambut Hari Sarawak 2026 di Universiti Teknologi Sarawak (UTS), ditu, Hari Tiga.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyadi pematak randau sesyen nya.
Premier Sarawak madah baru, kelimpah ngena manah pengulih kuasa hidro, Sarawak mega ngena pemesai dandang kampung ujan tropika nyadi aset strategik dikena mansutka penatai pemisi baru nengah dagang karbon, lalu nentuka pengawa ngintu rampa menua meri asil ekonomi ngagai nengeri.
“Nya alai, kitai Sarawak nyadi ‘carbon sink’, kitai ke nginsap karbon, ‘somebody has to pay’. Ari nya, dunya udah bisi protokol dikumbai ‘carbon trading’.
“Reti nya, siti penatai pemisi baru ungkup Sarawak seraya kitai ngetanka conservation kitai bekenaka rainforest,” ku iya.
Berebak enggau nya terang iya, agenda pemansang gadung nya mega disukung nengah pejalai Skim Pelajar Tinggi Pechuma Sarawak (FTES) ke nyelinting bidang bepelasarka teknologi dikena nempa modal mensia bepengelandik tinggi ngambi tetangkupka peminta industri kuasa enggau ekonomi dudi hari.
Iya madah baru, pengawa meranak puku ba pelajar enggau pemansang pengelandik nyadi pekara beguna nentuka Sarawak terus ulih besemekih nyadi ekonomi ke disungkak inovasyen, kuasa beresi enggau teknologi.
Urung 1,000 nembiak ari mayuh institusyen pelajar tinggi enggau sekula ngulu sesyen townhall nya.
Sama datai, tiga Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof. Dr. Sim Kui Hian, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah, Menteri Pelajar, Inovasyen enggau Pemansang Pengelandik Sarawak, Dato Sri Roland Sagah Wee Inn, Menteri Pengangkut Sarawak, Dato Sri Lee Kim Shin, Menteri Utiliti enggau Telekomunikasyen, Dato Sri Julaihi Narawi, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki, bala Sapit Menteri sereta tuai-tuai opis. -EDISI UKAS
