SIBU: sarawak nurai siti agi sejarah ba industri energi sepengudah kompeni minyak enggau gas enggi nengeri tu, Petroleum Sarawak Berhad (PETROS) mujur ngulihka mimyak keterubah ba palan Adong Kechil West (AKW), semak Marudi ti mega keterubah ngasil minyak darat sepengudah lebih 50 taun.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang openg madah, pemujur ngulihka 800 tong sehari tauka urung 24,000 tong sebulan nya nyadi perais pemadu berega ngagai rayat nengeri tu serimbai pengerami nyambut hari sarawak 2026.

Ku iya, tu bela mandangka pengulih anak sarawak ba industri minyak enggau gas lalu ngenegapka penuduk nengeri nyulut ba industri energi lebih agi baka ammonia enggau hidrogen biru.

"Pemujur tu mandangka pengulih anak Sarawak lalu mai reti Sarawak tegap ba industri minyak enggau gas nyengkaum derivatif ari gas metana.

"Tu perais ke chukup besai serimbai Hari Sarawak taun tu. Diatu Sarawak nyadi pemain ke besai ba industri minyak enggau gas bepun ari anak Sarawak empu," pia ku iya.

Iya bejaku munyi nya maya Pengerami Begempuru Hari Sarawak enggau Konsert Rayat ditu, Hari Tiga

Bela datai Yang Di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi.

Maya nya mega, Premier Sarawak sekali agi mai berita gaga alai AirBorneo ngepunka penerebai keterubah Kuching-Singapura berengkah sehari nya.

Ku iya, pemujur nya nangkan penerebai keterubah Kuching-Kuala Lumpur kena 20 Julai tu tadi kelimpah AirBorneo mega disadang bisi penerebai Kuching-Jakarta dalam kandang dua bulan deka datai.

Sama bisi datai ba pengerami nya, Sapit Menteri Besai Datuk Amar Fadillah Yusof, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nassar, Menteri Pengangkut Sarawak ke mega Menteri Pengatur Pengerami Hari Sarawak 2026 Dato Sri Lee Kim Shin, Menteri-Menteri Perintah Besai enggau Perintah Sarawak, Sekretari Perintah Sarawak Datuk Amar Mohamad Abu Bakar Marzuki, raban Sapit Menteri sereta pemesai ke bukai.-EDISI UKAS