Teknologi Digital, Data Nyungkak Transformasyen Administrasyen Dudi Hari Sarawak
SIBU: Sarawak deka majak negap pengawa bekenaka teknologi digital enggau data nyadi pugu transformasyen administrasyen nengeri nentuka polisi enggau perambu pemansang dipejalai sika ragi, meruan enggau bemalinka fakta seriris enggau ubah landskap teknologi global.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, teknologi digital diatu ukai semina siti utai ti tau nyadi, tang udah nyadi nyata ulih ngubah chara dunya gawa, ngatur pengawa enggau ngaga pemutus.
Ku iya, ubah nya meransang Perintah Sarawak ransing agi ngatur Konvensyen Ekonomi Digital Antarabansa Sarawak (IDECS), ke nyadi pelasar ngempuru bala pakar teknologi ari selampur dunya bekunsika penemu anda sida sereta pengerembai teknologi baru.
“Kitai mai bala pakar ari selampur dunya ba teknologi baru ngambi kitai ulih ngubah peragam penemu bekaul baka ni ngatur rampa ke baru,” ku iya.
Iya nibar ke jaku nya ba sesyen Townhall serimbai Nyambut Hari Sarawak 2026 di Universiti Teknologi Sarawak (UTS), ditu, Hari Tiga.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyadi pematak randau sesyen nya.
Premier Sarawak mega madah, pengawa bekenaka teknologi baru nyengkaum blockchain ngasuh perintah ulih ngemeran chara adiministrasyen ke nemban agi enggau ngangkatka data nyadi pugu ngaga pemutus.
Ku iya, data ke betul enggau amat patut nyadi malin dikena ngaga langkar polisi sereta perambu pemansang dikena nentuka tetiap pemutus digaga bepelasarka analisis ke serap.
“Ekonomi digital mai reti kitai ngena teknologi ngulihka data dikena merambu polisi kitai,” ku iya.
Iya mega madah, chara bepelasarka data dikeandal ulih nambah penau perintah napi pemar dudi hari, kelimpah nentuka pemansang Sarawak dipejalai strategik, nemban enggau besai empas.
Sama datai, tiga Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof. Dr. Sim Kui Hian, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah, Menteri Pelajar, Inovasyen enggau Pemansang Pengelandik Sarawak, Dato Sri Roland Sagah Wee Inn, Menteri Pengangkut Sarawak, Dato Sri Lee Kim Shin, Menteri Utiliti enggau Telekomunikasyen, Dato Sri Julaihi Narawi, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki, bala Sapit Menteri sereta tuai-tuai opis. -EDISI UKAS
