Mereti Ke Sejarah Penumbuh Malaysia, MA63 Patut Ditegap Ba Jeman AI
SIBU: Mereti ke pekara betul bekaul sejarah penumbuh Malaysia enggau Sempekat Malaysia 1963 (MA63) patut majak ditegap ba rebak biak nentuka fakta sejarah enda ngasuh saru, lebih agi lebuh ‘artificial intelligent’ (AI) majak malut chara komuniti ngulih enggau nisih penerang.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nguasa penemu sejarah penumbuh Malaysia enggau isi MA63 beguna endar ngambi rayat ulih mereti ke pun penumbuh menua sereta ngingatka hak Sarawak ke bisi ba sempekat nya.
Ku iya, Malaysia ditumbuh ari pekara dipesetuju kandang menua ke begempung numbuh siti menua bedaulat, nya alai sejarah nya patut ditemu reti semua ngambi rebak dudi enda ngasuh saru.
“Kelia, Sarawak bisi penekul ari sukut penau bejalaika hak nya, tang diatu udah bebida laban nengeri tu majak entap ari sukut ekonomi enggau institusyen.
“Nya alai, kitai diatu ba penuduk ke manah agi negika hak Sarawak senutuk enggau semangat MA63,” ku iya.
Iya nibar ke jaku nya ba sesyen Townhall serimbai Nyambut Hari Sarawak 2026 di Universiti Teknologi Sarawak (UTS), ditu, Hari Tiga.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyadi pematak randau sesyen nya.
Iya mega merambu institusyen pelajar tinggi negap pengawa ngajar bekaul sejarah penumbuh Malaysia enggau MA63 nentuka graduet sereta sida ti deka gawa perintah bisi pemereti ati ke nyengala bekaul pun penumbuh menua.
Ku iya, pengawa nguasa sejarah bepuguka fakta betul ngambi rayat ulih nyerenih siti-siti penerang enggau kritis, lebih agi lebuh AI majak diguna nyadi malin enggau ngiga penerang.
“AI semina ulih meri penerang bepelasarka data ke dipelajar iya lalu ukai reti fakta ke betul enti malin enda betul,” terang iya.
Berindik ari nya, iya meransang rebak biak majak bemalinka penerang sejarah ke ulih dipechaya sereta negap pemereti ati ngagai MA63 nentuka fakta sejarah majak dijaga lalu penuduk Sarawak ba Serakup Malaysia ditemu reti enggau betul.-EDISI UKAS
