Orang Baru Kereja Perintah Dipinta Ngembuan Runding Semampai Deka Belajar
KUCHING: Orang ke baru kereja perintah ditangkan ngambika ngembuan runding semampai deka belajar dikena nyikap diri seruran nemu polisi, inisiatif enggau kuing tuju Perintah Sarawak dikena nyungkakka tikas pemanah gawa ke majak dinamik.
Sekretari Perintah Sarawak Datuk Amar Mohamad Abu Bakar Marzuki madah, sida patut nambah penemu diri lalu enda semina bepanggai ba penemu ke diulih ba pelajar tinggi aja tauka latih ke diberi.
Ku iya, pengulih pegawai perintah silik agi nemu isu rama enggau polisi ke dibai Premier Sarawak ngelai penau sida nyukung agenda pemansang nengeri.
"Kita ke nyadi pegawai kanan, enti deka nemu sesebengkah pekara, patut ngansak diri. Kitai meseti bisi runding nambah penemu lalu semampai nitih isu ke nyadi," pia ku iya.
Iya nibar penemu nya maya Pengawa Ngenatai Lalau Sekretari Perintah Sarawak enggau Nyua Surat Pangku Pengawa ditu, Hari Empat.
Datuk Amar Mohamad Abu Bakar bela minta orang kereja perintah landik bekenaka teknologi digital enggau teknologi 'artificial intelligence' (AI) ke nyadi medium nambah penemu bekaul isu rama enggau bidang ti kurang ditemu, nyerumba ubah teknologi ke majak nyadi.
Ba pengawa nya, bisi 22 iku nerima surat pangku pengawa nyadi Pegawai Tadbir Gred N29 lalu tujuh iku agi Penolong Pegawai Tadbir Gred N5.
Iya madah, pengawa nyiri gawa nya siti tanggungpengawa ke besai ba tiap iku bala pegawai gawa enggau strategik agi, kreatif sereta inovatif meri servis gawa pemadu manah ngagai rayat.
Awak nya bela dikena iya bekunsika peneleba iya gawa alai suba ba taun 1988 iya kala enda mujur gawa ba Perkhidmatan Tadbir Sarawak sebedau berengkah gawa perintah nengah Yayasan Sarawak lalu diatu dichiri nyadi Sekretari Perintah Sarawak.
Iya madah, enda mujur keterubah ukai nentu pengelantang dudi hari tang pemujur nya bepanggai ba pengeransing sereta semampai ransing deka belajar lalu ngereja pengawa enggau manah. -EDISI UKAS
