BELAGA: Orang indu di Sarawak ditangkan ngambika nyungkak pengelandik, bekenaka teknologi digital sereta ngereja pengawa dagang.

Kaban Parlimen Sri Aman ke mega Tuai Raban Indu Parti Rayat Sarawak (PRS) Dato Sri Doris Sophia Brodi madah, orang indu patut semampai nyikap diri enggau penemu, pengelandik enggau teknologi dikena ngangkat tikas sosioekonomi ruang bilik.

Ku iya, pemansang Sarawak bepuguka empat pekara iya nya ekonomi, pelajar, energi enggau rampa menua ngerandang mayuh agi peluang ngagai orang indu bela ngambi bagi ba pengawa dagang lebih agi industri kotej enggau ekonomi digital.

"Penemu ke diulih ari woksyop tau nyadi pemun ngepun dagang mit ari rumah. Teknologi digital maya hari tu tau dikena ngelaku sereta ngerembaika dagang," pia ku iya.

Iya madah munyi nya maya Program Jelajah ‘Jom Sedia’ Wanita PRS 2026 di Uma Bakah, Sungai Asap, Hari Tiga.

Iya mega meransang orang indu landik bekenaka inisiatif ke disedia Perintah Sarawak nyengkaum pelajar tinggi pechuma ba institusyen pelajar enggi perintah nengeri ke dikena nempa mayuh agi raban bepengelandik ti ulih nyaup pemansang nengeri.

Ba pengawa nya mega, Kaban Kunsil Nengeri ADUN) Murum, Kennedy Chukpai Ugon madah, program sehari nya setipak enggau pengeransing Perintah Sarawak nyungkak raban indu nengah pelajar, latih pengelandik, pengawa dagang enggau ekonomi digital.

"Program baka tu ukai semina meri penemu enggau pengelandik baru aja ngagai orang indu tang bela nyaup ngembing nambah penatai pemisi diri," ku iya madah.

Program renggat ketiga nya digulu urung 300 penyereta ari Kunsil Nengeri (DUN) Murum enggau Belaga. -EDISI UKAS