KUCHING: Sarawak majak negapka pengawa trasformasyen struktur ekonomi ari bepelasarka komoditi ngagai ekonomi gadung, beteknologi tinggi enggau meruan nyadi sebagi ari agenda pemansang timpuh panjai nengeri.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, transformasyen nya deka disungkak nengah pengering ekonomi sereta kerejasama rat enggau Perintah Besai.

Ku iya, chara bela bulih pemaik deka ngasuh Sarawak nyingkang gah negapka pemansang enggau nambah pengelantang rayat.

“Aku pechaya ari bela bulih pemaik entara bala tuai Perintah Besai enggau Sarawak, sereta Sabah, kandang menua tu deka majak nyingkang nuju transformasyen ari siti ekonomi komoditi ngagai ekonomi gadung beteknologi tinggi enggau meruan diayung Malaysia ke progresif enggau entap,” ku iya.

Iya nyebut pekara nya ba pesan serimbai ngintu Hari Kebangsaan Ke-69.

Ku Datuk Patinggi Abang Zohari, Perintah Besai betuai ke Menteri Besai Dato Seri Anwar Ibrahim mega meri jamin terus negapka kerejasama enggau Sarawak sereta Sabah ke pengelantang rayat sereta pemansang ke asi enggau sebela.

Ku iya, sukung enggau kerejasama nya beguna endar ngambi Sarawak ulih nampung agenda pemansang ke udah dilangkar nengah Strategi Pemansang Pengudah COVID-19 (PCDS) 2030.

Iya mega madah, Sarawak diatu bisi pemun ke entap dikena bejalaika transformasyen ekonomi nya ngena pengering ba sektor energi ulih dikena baru, pun pemansut asal, betanam betupi sereta industri baru bepelasarka teknologi. -EDISI UKAS