Projek Ngadu Jalai Melikin Nyamai Nganjung Asil Kebun Peranak
BALAI RINGIN: Pengidup peranak Kampung Danau Keranggas, Melikin diatu majak manah pengudah projek ngaduka Jalai Melikin tembu laban nyamai nganjung asil kebun ke kilang nyentuk empat ngagai enam kali sehari.
Tuai Rumah Danau Keranggas, Luang Penguan madah, pekara nya meri empas positif ngagai penatai pemisi ruang bilik dibanding sebedau jalai nya diadu laban peranak semina ulih nganjung asil kebun sekali dua aja sehari ketegal jalai jai.
“Tu bebida sebedau projek digaga laban peranak ba menua Melikin nyengkaum Danau Keranggas semina ulih nganjung asil kebun ke kilang sekali dua aja sehari ketegal jalai balat jai,” ku iya.
Iya nyebut pekara nya ba Pengawa Bejadi Projek Tembu Agensi Penyeraris Pemansang Greater Kuching (GKCDA) Sitak Kunsil Nengeri (DUN) Balai Ringin - Ngadu Jalai Melikin, ditu Hari Enam.
Ku Luang, projek ngadu Jalai Melikin beungkus RM7 juta lalu ulih ditengah bulan Julai taun nyin tadi.
Iya mega madah, perengkaguna jalai ke manah agi ukai semina ngasuh peranak lantag mindah, tang asil kebun ulih dianjung ke kilang enggau suah agi, sereta mantu nambahka ekonomi ruang bilik.
Berebak enggau nya, iya madah ke kereja ngaduka jalai kebun Melikin beungkus RM300,000 mega ngasuh peranak nyamai ngereja aktiviti bekebun ba tanah sida empu.
Kelimpah ari nya, peranak mega dipadah bekaul perambu Perintah Sarawak ngaga pengkalan mandi beungkus RM300,000 ke deka meri penguntung ngagai peranak ba genturung pendiau Danau Baru enggau Danau Melikin.
Ngenang pekara bukai, Luang madah ke pejalai Projek Bekal Ai Kandang Menua Serian Renggat II Sitak Serian dipejalaika Perintah Sarawak deka ngasuh peranak Danau Keranggas ulih ngasaika perengkaguna bekal ai beresi maya projek nya tembu ila.
Berindik ari nya, iya ngarap ke peranak Melikin lebih agi Kampung Danau Keranggas liat ati nganti mayuh projek pemansang tembu digaga ke dikeandal ulih ngangkatka tikas idup sida.
Dulu ari nya, Pengaw Bejadi Projek Ngadu Jalai Melikin ari baruh GKCDA enggau Sistem Pemadah Rikod Jalai Malaysia (MARRIS) dipenyadika SapitMenteri Dagang Temuai, Industri Kreatif enggau Seni Pemerindang Sarawak ke mega Kaban Kunsil Nengeri (ADUN) Balai Ringin, Datuk Snowdan Lawan. -EDISI UKAS.v.
