KUCHING: Perintah Sarwak nengah Opis Menteri Pengerai Mensia Mayuh, Pengawa Berumah enggau Perintah Lokal sereta Opis Pengerai Sarawak chakah matau pekara pengerai bepun ari penusah sebun ke nyadi di selampur nengeri.

Sapit Premier Sarawak, Datuk Amar Profesor Dr. Sim Kui Hian madah, perengka guna pengerai ulih dikena sebarang maya dikena napi penanggul ketegal sebun nyengkaum ubat.

"Aku meri jamin perengka guna pengerai Sarawak chukup dikena sebarang maya.

"Stok ubat, perengka perubat, nyengkaum sengkabung mua enggau silinder oksigen endang chukup," pia ku iya nengah siti penerang media.

Iya ke mega Menteri Pengerai Mensia Mayuh, Pengawa Berumah enggau Perintah Lokal Sarawak madah, kes baka 'acute upper respiratory tract infection' (URTI) enggau konjunktivitis bisi nambah ketegal tikas pengamah angin majak enda manah kenyau ari pun bulan Ogos.

Ku iya, urung 1,717 iti kes nyadi seminggu ba pun taun nambah nyadi 1,752 iti kes seminggu dalam kandang beberapa minggu tu lalu kes konjunktivitis nambah ari urung 17 ngagai 21 kes seminggu.

Iya madah, kes URTI majak nambah tengan bulan Ogos alai Zon Selatan ngerikod 1,250 iti kes, Zon Tengah lebih 1,000 kes enggau Zon Utara semak 400 kes.

Datuk Amar Profesor Dr. Sim mega madah, Jabatan Kecemasan dan Trauma Hospital Besai Sarawak bela ngerikod mayuh pesakit asma bulan siti tadi tang penyampau nya enda majak nambah.

Iya enggau nya, ngelalau mensia mayuh bela nyaga pengerai diri sereta ngulihka penerang ke amat bekaul tikas pengamah angin. -EDISI UKAS