PAKAN: Pengerai meseti dikemerat laban komuniti ti gerai nyadi pugu nyukung pemansang sereta pengelantang komuniti.
Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua), Tan Sri Datuk Sri William Mawan Ikom madah, tikas pengerai ti manah nentuka komuniti terus ransing nyungkak bemacham sukut pemansang.
Iya mega meri terima kasih ngagai bala raban gawa ba luan ti semampai ransing gawa nentuka pengelantang komuniti, kelebih agi ba kandang menua pesisir.
“Pengerai tu pekara ti chukup beguna ngagai mensia. Ari tubuh ti bepengerai, kitai ulih ngemujur bemacham sukut pemansang.
“Nya kebuah, aku ngarap mayuh agi aktiviti baka tu ulih diatur dikena nambah pengeleda mensia mayuh bekaul pemesai guna nyaga pengerai,” ku iya.
Iya madah munyi nya lebuh Program Kimpin Pengeleda Pengerai Indu enggau Beperesa Pengerai diatur Panel Penyanding Penemu Klinik Pengerai Pakan di Rumah Janting, Jalai Wak Enturong Lemujan, Pakan, kena Hari Enam.
Ku iya, program ti ngemerat sukut meri pengeleda, nagang enggau beperesa tumu beguna endar laban ulih nyaup komuniti ngereja pengawa ti patut ngagai tikas pengerai sida.
Berebak enggau nya, iya madah ke penyanggup terus mantu enggau meri sukung ngagai program pengerai ti meri empas ngagai komuniti.
