RM12,000 Ngemujur Aktiviti Gerempung Indu Enggau JKKK Nanga Ban
BETONG: Gerempung indu sereta Komiti Pemansang enggau Pengelikun Genturung Pendiau (JKKK) Rumah Panjai Nanga Ban nerima agih belanja sepenyampau RM12,000 dikena nyukung aktiviti ninting taun sereta negap pemansang komuniti menua.
Pengawa nyuaka chek enggau agih belanja nya udah dikemendar ba Pengerami Merarau Serakup Indu enggau JKKK Rumah Morris Nanga Ban, Betong 2026 ti dipenyadi Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN Layar), Datuk Gerald Rentap Jabu di Rumah Panjai Nanga Ban, ditu kena Hari Enam.
Ari penyampau nya, Datuk Gerald udah nyuaka chek Projek Mit Pemansang Menua Pesisir (MRP) sepenyampau RM4,000 ngagai Gerempung Indu Nanga Ban sereta agih belanja tambah RM3,000 ngagai JKKK Nanga Ban.
Nangkan nya, Kaban Parlimen Betong, Dato Dr Richard Rapu mega ngemendar agih belanja sepenyampau RM5,000 ngagai Gerempung Indu Rumah Panjai Nanga Ban.
Agih belanja nya kelai sukung enggau ngenang pengawa komuniti, kelebih agi kerejasama entara Gerempung Indu enggau JKKK Nanga Ban dikena ngatur program ngaul komuniti baka Pengerami Merarau sereta bemacham aktiviti bukai ungkup peranak rumah panjai.
Nya alai, agih belanja nya dipeda ulih nyaup negap pangku pengawa Gerempung Indu enggau JKKK nyadi jematan entara peranak rumah panjai enggau agensi perintah sereta pengari rayat, kelimpah nyukung atur program ti nguntungka komuniti.
Dato Dr Richard Rapu mega meri tabi puji ngagai Gerempung Indu Nanga Ban laban ransing ngatur bemacham aktiviti kenyau ari ditumbuh.
