MUPONG: Peranak kelebih agi komuniti Iban di Mupong enggau Teluk Gelam dipinta ngetan tanah Adat Bansa Asal (NCR) ti dikembuan sida nentuka aset nya terus meri pemaik ngagai rebak dudi.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, tanah NCR nya aset beguna ti berega ba timpuh panjai ngagai pengempu tanah enggau ruang bilik sida.

Ku iya, pesan nya nipak jaku dikenatai Sapit Premier Sarawak, Datuk Amar Douglas Uggah Embas ti dekaka tanah NCR ti udah disukat enggau diaku perintah terus ditan pengempu tanah nya.

“Perintah Sarawak udah naka ulih nyukat tanah ngambi ulih diagih ngagai peranak ti bisi tanah.

“Nya kebuah pengudah tanah tu udah diulih, kitai ngarap peranak ulih ngetan lalu anang nyual ngagai orang bukai ti semina meda peluang ngulihka untung ba timpuh pandak,” ku iya lebuh Randau Begulai Enggau Tuai Rumah di Sekula Primari (SK) Mupong, ditu kena Hari Enam.

Ku Datuk Abdullah, pemansang infrastrukur baka projek jalai sepanjai 5.8 kilometer, tiga jalai spur enggau dua jematan beungkus urung RM82 juta ti nyambung Mupong ke Teluk Gelam sereta jalai Tanjung Manis-Sarikei-Sibu mega deka ngerandang mayuh agi peluang ekonomi ngagai peranak.

Berebak enggau nya, iya ngingatka mensia mayuh berati ke tanah NCR nyadi pesaka ungkup rebak dudi, kelimpah meransang sida nambahka mayuh pun penatai pemisi nengah nupi jelu enggau industri ili bepelasarka asil betanam betupi.

Iya mega ngelalau peranak nambah mayuh pun penatai pemisi enggau nyerungkai bidang nupi jelu sereta industri ili bepelasarka asil betanam betupi.

“Anang semina bepanggai ba siti pun penatai pemisi. Kita meseti berati ke peluang bukai nyengkaum nupi jelu enggau industri ili ngambi asil ulih diadu lalu meri mayuh agi penguntung,” ku iya. - EDISI UKAS