LUBOK ANTU: Sepenyampau RM178,000 diagih nengah Geran Projek Mit Pemansang Menua Pesisir (MRP) enggau Program Transformasyen Menua Pesisir (RTP) dikena nambahka perengka guna pemun enggau nyukung pemansang komuniti di Pelasok, Skrang.

Kaban Parlimen Lubok Antu, Roy Angau Gingkoi ngemendarka agih belanja nya lebuh bejadiaka Pengawa Nangguh Woksyop Negap Pengawa enggau Pangku Pengawa Tuai Komuniti enggau Tuai Raban Bansa sereta Komiti Pemansang enggau Pengelikun Genturung Pendiau (JKKK) Pelilih Lubok Antu di Rumah Thomas Jepit, Pelasok, Skrang.

Ari penyampau nya, RM150,000 diagih nengah RTP ngagai JKKK Pelasok dikena ngaduka sistem paip ai, seraya geran MRP sepenyampau RM20,000 diberi ngagai JKKK Pelasok enggau RM8,000 ngagai Gerempung Indu Pelasok.

Agih belanja nya dikeandal nambahka pengelantang peranak, lebih agi ari sukut bekal ai, kelimpah nambahka aktiviti ngaul komuniti di menua nya.

Lebuh bejaku, Roy nyemetak madahka Tuai Komuniti enggau Tuai Raban Bansa enggau JKKK bejalaika pangku pengawa besai nyadi jematan entara rayat enggau perintah dikena nentuka tetiap peminta enggau penanggul peranak nerima perati nitih pematut.

Ku iya, penemban pemansang renggat rumah panjai bepanggai ba bala tuai renggai baruh ke bepenemu, bisi integriti enggau regas nyeraris peminta komuniti.

Berindik ari nya, iya ngarapka semua penemu enggau malin ke diulih sepanjai woksyop ulih dikena maya gawa, lebih agi negapka atur pengawa sereta ngatur JKKK.

Iya mega meransang Serakup Tuai Komuniti enggau Tuai Raban Bansa (KMKK) Pelilih Lubok Antu ngerembaika inisiatif pemansang kapasiti bala tuai ari ngatur mayuh agi woksyop enggau program bekunsi penemu.

Roy bisi ngenang pemesai guna pelajar tinggi, bantu ngagai pekebun mit sereta inisiatif pemansang ekonomi enggau pengelantang rayat, nyengkaum bejalaika pelajar tinggi nadai bebayar ba universiti enggi Perintah Sarawak.

Seraya Pegawai Pelilih Lubok Antu, Akoi Anak Ekau madahka pemesai guna Tuai Raban Bansa enggau JKKK ngembuan tunga kuing ke nyengala sereta mutar dulu penanggul renggat komuniti sebedau dibai ngagai raban bekuasa bekaul.

Iya mega madah, pengawa nyiri Tuai Rumah patut nitih atur ditetapka dikena nentuka pengawa lurus sereta lanchar.

Entara isi program iya nya licha bekaul pangku pengawa enggau tanggungpengawa Tuai Raban Bansa enggau JKKK ari pengari Opis Pelilih Mit Engkilili, Edwin Mat.

Sama datai, Sekretari Politik Premier Sarawak, Kua Jack Seng, Sekretari Politik Sapit Menteri Besai , Mikai Mandau, pengari Tuai Polis Pelilih Lubok Antu, Inspektor Harper Kenol, Chairman Serakup KMKK Pelilih Lubok Antu, Pemancha Grang Juben sereta bala tuai komuniti enggau tuai raban bansa pelilih nya.-EDISI UKAS