KAPIT: Sepenyampau RM96,000 diagihka 23 Komiti Pemansang enggau Pengelikun Genturung Pendiau (JKKK) sereta Biro Indu di menua Ulu Rajang nengah Projek Mesra Rakyat (PMR) 2026 dikena nyukung aktiviti enggau peminta pemansang komuniti menua nya.

Sapit Menteri Digital ke mega Kaban Parlimen Hulu Rajang, Datuk Wilson Ugak Kumbong madah, agih belanja nya diberi dikena mantu negap aktiviti ngaul komuniti sereta perengkagun diguna peranak dia.

Iya nyebut pekara nya lebuh bejadi pengawa nyua chek nya sereta bejadika projek beungkus RM200,000 di Rumah Inguh Miut, Sungai Paku, Mujong, ditu Hari Enam.

Projek dipenyadi nya ngaul pengawa ngaga jalai semin, ngaduka rumah Biro Indu enggau ngaga jenila dikena nambahka perengka guna enggau pengelantang peranak.

Projek enggau agih belanja nya ngayanka pemansang komuniti di menua ulih seruran dikenati.

Bela datai, pengari Residen Sitak Kapit, Rolyn Terrance Janting, bini Kaban Parlimen Hulu Rajang Datin Leytha Kupa sereta Tuai Komuniti Menua Gaat Penghulu Anyi Kumbong.- EDISI UKAS