BETONG: Urung 1,000 pengusung ngerichah Konsert Layar Cycling serimbai Layar Cycling Carnival Edisyen Ke-8 2026 di Panggau Besai, Arena Futsal RTC Betong, kena malam Hari Enam.
Konsert nya beperindang enggau artis lokal nyengkaum Ricky Anderson, Richard Lee, Fred Alpha, Athirah enggau Alvin John ke merindang bala pengusung datai ari serap komuniti.
Malam nya mega richah enggau chabut tikit benasip ti nyendiaka tiga perais besai iya nya televisyen LED Toshiba, peti ais Dekka bekapasiti 190 liter enggau injin basu Dekka bekapasiti 7.5 kilogram.
Kelimpah beperindang enggau muzik, bala pengusung bela dinah bemacham pemakai ba bansal bejual lokal ngelingi RTC Layar, lalu nya meri awak ngagai orang dagang menua ngelaku produk enggau ngulihka penatai pemisi.
Layar Cycling Carnival ukai semina mantaika pekit lumba ensikal aja, tang ngempung elemen pemerindang, pemakai enggau aktiviti komuniti dikena matak pengusung sereta ngeranchakka aktiviti ekonomi menua.
Konsert nya bela digulu Sapit Menteri Nembiak, Lumba enggau Pemansang Orang Dagang Sarawak ke mega Kaban Kunsil Nengeri (ADUN) Layar Datuk Gerald Rentap Jabu, Injinir Sitak Opis Kereja Raya (JKR) Betong ke mega Chairman Komiti Pengatur Layar Cycling Carnival 2026 Jason Ng Boon Tuan sereta Penguasa Tanah enggau Survei Sitak Betong TPr Moris Nyaup.- EDISI UKAS
