KUCHING: Sepenyampau 150 penerima bantu ninting buln Opis Pengintu Pengelantang Mensia Mayuh (JKM) Sarawak nerima pemeri mata duit RM100 siku disempulang hamper serimbai Pengerami Hari Pengada Ke-80 Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, di Hotel Pullman Kuching kena Hari Minggu.
Penerima datai ari 26 lelaki enggau 124 indu, ngaul raban orang tuai, indai tunggal sereta nembiak mit.
Pemeri mata duit nya datai ari raban Astana, seraya hamper disedia nyadi bantu bukai ngagai penerima.
Pengerami Ngirup Teh nya bela meda pengawa nyirap pulut kuning ari Tun Pehin Sri Dr Wan Junaidi disempulang Toh Puan Datuk Patinggi Fauziah Mohd Sanusi kelai selamat ke hari pengada iya.
Pengerami bela richah enggau meda video khas pejuluk “Bukan Sekadar Seorang Pemimpin” ti mantaika pendiau diri nyadi tuai ruang bilik sereta tuai ti serurn kemerah enggau rayat.
Achara udah nya beperindang enggau tanda “Dirgahayu Kesuma Tuan Yang Terutama” ari Artis Tanda Kaunsil Seni Sarawak, tebah sape ari Frederick sereta lagu disadaka Abang Hafidz, Mieysanisha enggau Bob Yusof digembar Star Fourpiece Band.
Pengerami udah nya richah enggau pengawa belagu bebala mayuh begulai enggau bala menteri sebedau pengerami tembu enggau lagu Negaraku enggau Ibu Pertiwiku ari Pancaragam Polis DiRaja Malaysia.
Berebak enggau nya, Menteri Utiliti enggau Telekomunikasyen Sarawak ke mega Menteri Ngempu Tanggungpengawa Dato Sri Julaihi Narawi nyua tepa ngagai Tun Pehin Sri Dr Wan Junaidi enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, seraya Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali nyua tepa ngagai Toh Puan Datuk Patinggi Fauziah enggau anak Premier Sarawak Dayang Norjihan.
Sama datai, Sapit Menteri Besai Datuk Amar Fadillah Yusof, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua DBKU enggau Pekara Agama Islam) Datuk Dr Abdul Rahman Junaidi sereta bala bukai.-EDISI UKAS
