HULU RAJANG: Sungai nyadi kedap pengidup peranak Kapit, lebih agi nyadi jalai penyambung sebedau pemansang rentayan jalai alun nyambung menua nya.
Sapit Menteri Digital Malaysia ke mega Kaban Parlimen Hulu Rajang, Datuk Wilson Ugak Kumbong madah, sungai chukup besai guna enggau reti ba peranak menua lalu nya ngasuh pengawa ngintu pemeresi sungai enggau pemeruan pemansut ai patut diberi perati.
Iya bela nerang, menua Sungai Tunoh dikelala nyadi menua mansang nyadi pelilih ke deka ditapat peranak menua nya ngulihka servis perintah, nyengkaum perambu pemansang nirika rumah panjai ke moden agi dikena nambahka pengelantang peranak dudi hari.
Iya nyebut jaku nya ba mua mayuh rambau Program Ngintu enggau Nyaga Sungai Tunoh di Rumah Ajan, Nanga Apau, Sungai Melinau, Mujong, kena Hari Lima.
Seraya Direktor Pengatur Pemansut Ai enggau Hidrologi, Opis Parit enggau Entali Ai Malaysia, Ir. Anita Ainan, nyemetak madahka pengawa ngintu pemansut ai nyadi tanggungpengawa begulai ke begunaka kerejasama perintah, agensi beekaul enggau peranak menua nya.
Iya bela madahka pengawa ngamah, muai uras, telusur tebing sungai enggau seradak tanah tau ngachau kualiti ai sereta pemeruan ekosistem.
Nya alai iya minta peranak nyaga pemeresi sungai enggau ngaga ripot sebarang aktiviti ke tau ngeruga pemansut ai.
Program diatur Opis Parit enggau Entali Ai (JPS) Kapit serimbai enggau Ekspedisyen Pemansut Ai Menua (EKSAN) Ke-8 Taun 2026 enggau digulu urung 200 penyereta, nyengkaum bala tuai komuniti, peranak menua nya sereta pengari agensi perintah.
Bela datai, Tuai Opis JPS Kapit, Inja Hellegers Achong, pengari Opis Pelilih Kapit, Thomas Geoffrey Kendawang, Tuai Kaunsil Sungai Sarawak Sitak Kapit Carol Bungan Leo sereta Tuai Rumah Ajan.-EDISI UKAS
