TYT Sarawak Nerima Penatai Premier, Mantai Perambu Madamka DUN
KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar udah nerima penatai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Astana Negeri Sarawak kena Hari Lima.
Lebuh berandau, Premier Sarawak udah mantaika perambu madamka Kunsil Nengeri (DUN) Sarawak dikena minta penemu Yang di-Pertua Negeri Sarawak seriris enggau Konstitusyen Nengeri Sarawak.
Randau nya sebagi ari proses konstitusyen ke patut diatur sebedau madamka DUN dikena meri awak ngagai Pengawa Bepilih Besai Nengeri
Sarawak Ke-13 (PRN-13).
Bela datai maya nya Luyar Besai Sarawak, Dato Sri Saferi Ali.
Berebak enggau nya, Tun Pehin Sri Dr Wan Junaidi mantaika pengandal ngambi semua pejalai pengawa bekaul pengawa bepilih ulih diatur lanchar, likun enggau berurun, bepelasarka prinsip demokrasi sereta kedaulatan undang-undang.
Iya bela minta rayat Sarawak seruran nyaga pengelantang, penyerakup enggau penegap nengeri sekumbang proses demokrasi nya dipejalai.
Yang di-Pertua Negeri Sarawak mega ngelalau semua raban bebasaka proses demokrasi sereta bejalaika tanggungpengawa diri empu enggau manah sereta lurus.
Urung pukul 3.30 ngalih hari Hari Lima, Premier Sarawak udah mantaika pengawa madamka DUN Sarawak berengkah ari 26 Oktober 2026 dikena meri awak ngagai PRN-13.
