Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, chara nya seriris enggau Pelin Pemansang Udah COVID-19 (PCDS) 2030 ti bepuguka tiga tiang besai, iya nya pengelantang ekonomi, inklusiviti rama sereta pemeruan rampa menua.
Ku iya, pengelain etnik, budaya enggau pengarap di Sarawak nyadi tiang pemun ngagai pengelantang komuniti ke patut majak dijaga, nyengkaum ngerembaika perati ngagai pemeruan rampa menua.
“Kitai di Sarawak ngembuan mayuh raban etnik enggau tirai juru budaya kediri empu, tang semua nya begempung nempa budaya enggau juluk ati Sarawak.
“Pengelain tu meri pengelantang dalam komuniti taja bisi bida pengarap enggau tirai juru raban bansa.
“Sehari tu, kitai deka ngerembaika chara tu enggau bela berundingka rampa menua laban pemeruan nya patut diatur setimbang enggau pengidup mensia,” ku iya.
Iya nibarka jaku nya ba mua mayuh rambau Pengerami Makai Lemai Gala Gempuru Besai enggau Simposium Saintifik Kaunsil Antarabansa ungkup Monumen enggau Taba (ICOMOS) di sebuah hotel tebilang ditu, Hari Lima.
Datuk Patinggi Abang Zohari ngarapka pengawa ngintu pengelantang enggau pemeruan ulih dkerembai ke renggat antarabansa nengah pengawa ICOMOS dikena ngintu pesaka, lalu nempa dunya ke likun.
Kelimpah ari nya, iya bela ngarapka ICOMOS ulih ngerembaika pengawa ngintu pesaka enggau nambahka pemereti ati rebak biak bekaul pemesai guna monumen sereta taba besejarah, nyengkaum asil sainstifik ditemu di rantau tu.
Bela datai, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, dua Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan enggau Datuk Sebastian Ting Chiew Yew, Presiden National Heritage Trust (Petra National Trust - PNT) Jordan ke mega Mandal Presiden Gerup Serantau Menua Arab bagi ICOMOS) enggau mega Duta Muhibbah ungkup Pesaka Budaya di Gerempung Pelajar, Saintifik enggau Main Asal Gerempung Bansa Beserakup (UNESCO) Yang Teramat Mulia Puteri Dana Firas sereta Presiden ICOMOS Malaysia Faisal Abdul Rahman.-EDISI UKAS
Pemberita: Nur Nabilla
Gambar: Ameerul Syafiq Khir
