KUCHING: Pemutus bekaul pengawa milih chalun Gabungan Parti Sarawak (GPS) ungkup pengawa bepilih deka datai dilempai ba bala tuai parti, nyengkaum nentuka chalun baru enggau penyandang ke agi disabung.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, iya sedia nyurutka diri pengudah 25 taun tauka lima penggal gawa, tang pemutus nya bela bepanggai ba penetap penemu parti enggau penemu peranak ba sitak diarika iya.
“Ba aku empu, aku sedia nyurutka diri. Taja pia, enti parti enggau peranak ba sitak ke diarika aku agi ngasaika aku agi dikeandalka gawa, aku enda ngenggai,” ku iya.
Iya nyebut jaku nya lebuh dirandau media sebedau pengawa bejadi
Regata Perau Naga Antarabansa 2026, di Tebing Ai Kuching, kena Hari Lima.
Iya madah, pemutus bekaul pengawa milih chalun baru tauka agi nyabung penyandang nya hak Premier Sarawak ke nyadi Chairman GPS lalu patut dilempai ba jari bala tuai parti nentuka nya.
Ku iya, berita bekaul chalun ke deka bediri minta pilih disadang dibantai ba hari ngantung nama chalun.
Bela datai, dua Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan enggau Datuk Sebastian Ting Chiew Yew. -EDISI UKAS
