KUCHING: Pengawa ngatur bemacham achara dagang temuai, lumba enggau main, main asal enggau dagang seretai ngasuh Tebing Ai Kuching majak richah enggau penatai temuai ari menua tu enggau menua luar.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengawa nyeraris bemacham achara ba siti timpuh bela mantu nambahka penatai pengusung sereta ngidupka pengerichah ba Tebing Ai Kuching.
“”Nya kebuah, enti kitai beratika Mengeri Besai Kuching, lebih agi ba Tebing Ai Kuching, chukup richah rami,” ku iya.
Iya nyebut jaku nya lebuh dirandau media pengudah bejadika
Regata Perau Naga Antarabansa 2026, di Tebing Ai Kuching ditu, kena Hari Lima.
Regata Perau Naga Antarabansa Sarawak 2026 Ke-12, Sarawak Regatta 2026, Festival Kraf Borneo Sarawak 2026, Panggau Seni, Showcase Usahawan Sarawak enggau Festival Gendang Melayu Sarawak nyadi entara achara ke diatur seretai.
Regata Perau Naga Antarabansa Sarawak 2026 Ke-12 enggau Sarawak Regatta 2026 ngena rambai jaku “Race For Harmony” diatur pengelama 10 hari ari 23 Oktober nyentuk 1 November 2026, ngempuruka elemen lumba ai, main asal, pengawa dagang ba sepanjai Sungai Sarawak.
Ba edisyen sekali tu, bisi 80 tim ari 22 menua ngambi bagi enggau 2,450 penyereta bepekit ba Regata Perau Naga.
Tujuh menua baru mega keterubah ngambi bagi iya nya Liechtenstein, Vietnam, Kemboja, Argentina, Fiji, Moldova enggau Mexico, lalu nya nunjukka pemanah timbal antarabansa majak nambah nyentuk raban pengatur nyau natak penyereta ngagai 22 menua aja.
Bisi tujuh kategori dipekit iya nya International Premier Open 20s, International Premier Open 12s, International Premier Mixed 20s, International Premier Women 12s, International Senior Open 12s, International Cancer Survivors 12s enggau kategori baru Malaysia Closed Men 12s ungkup penyereta beumur 50 taun enggau tuai agi.
Semua penyampau perais mata duit ungkyp Dragon Boat bela nambah dua kali lipat ngagai RM200,000 dibanding RM100,000 taun nyin tadi.
Seraya lumba asal Perau Bidar Sarawak Regatta deka diatur ari 30 Oktober nyentuk 1 November 2026 enggau 18 achara ngaul kategori lokal enggau tebuka, nyengkaum Marathon Antarabansa Borneo penyauh 3 kilometer.
Pengerichah achara ke diatur nya bela disukung penatai beribu temuai menua luar ke bisi di Kuching ke deka nguluh bemacham konvensyen enggau achara antarabansa, nyengkaum gempuru besai ke ngaul 109 menua enggau urung 1,800 diligiti sereta siti da konvensyen kena 24 Oktober ke ngaul urung 1,500 pengusung ari luar.
Sama datai, Menteri Besai Perlis Abu Bakar Hamzah enggau bini Paridah Ibrahim, dua Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan enggau Datuk Sebastian Ting Chiew Yew sereta Residen Sitak Kuching ke mega Chairperson Pengatur Sarawak Regatta Kuching-Waterfront Festival 2026, Dayang Joanita Azizah Abang Morshidi. -EDISI UKAS
Pemberita: Ezzah Syafiqah
Gambar: George S. Embie, Ezzah Syafiqah
