SIBU: Bala anak ba menua pesisir dipinta ngena manah peluang besai disediaka Perintah Sarawak ungkup nampung pelajar ngena silibus antarabansa.

Sapit Menteri Pelajar, Inovasyen enggau Pemansang Pengelandik I, Datuk Dr Annuar Rapaee, madah nyemetak perengka guna enggau peluang pelajar bisi kualiti diatu ukai semina trend ba mengeri aja, tang bela diberi ngagai nembiak menua pesisir nengah pengawa numbuhka Sekula Antarabansa Yayasan Sarawak.

Ku iya, inisiatif nya nyata ngayanka pengeran Perintah Sarawak nentuka nadai nembiak enda ampit akses pelajar seikas standard global.

“Uji perati, enti nadai perengka guna tu, nembiak ba menua pesisir ukai semina ulih bemimpi belajar ba sekula antarabansa ngena silibus global.

“Tang ari pengawa Perintah Sarawak ke ngerandang peluang besai nya, bala nembiak ba menua pesisir diatu bulih akses ke sebaka,” ku iya.

Iya nyebut jaku nya ngarika Menteri Pelajar, Inovasyen enggau Pemansang Pengelandik, Dato Sri Roland Sagah Wee Inn maya Simposium Iringtuai Digital 2026 di Hotel Kingwood, kena Hari Satu.

Ngenang silik, Datuk Dr Annuar mega bisi ngenang bekaul video dikerembai ke mantaika penanggul bida entara nembiak mengeri enggau menua pesisir, sereta nyemetak madahka peragam penemu baka nya enda patut bisi.

Iya nerangka Perintah Sarawak udah meri peluang ke sebaka, ke alai diatu bela diberi ngagai bala anak di menua pesisir dikena ngiri penemu ba rampa belajar ke moden.

"Peluang sehari tu nadai bida entara mengeri enggau menua pesisir, lalu perati diberi ngagai nembiak menua pesisir kitai.

“Pekara ke patut diberi perati lebuh peluang ke diberi, tang enda dikena manah bala nembiak kitai empu.

“Nya alai, anang nangi ngena peluang ke diberi, tang kitai patut irauka enda ngena peluang nya,” ku iya nyemetak.-EDISI UKAS